İslam Əməkdaşlıq Təşkilatı PA-nın Baş katibi Zəfər Günü münasibətilə Milli Məclisin sədrinə təbrik məktubu ünvanlayıb
Bu xəbəri paylaş
Vətən müharibəsində Azərbaycan xalqının qazandığı möhtəşəm Qələbənin birinci ildönümü münasibəti ilə xarici ölkələrin dövlət rəsmilərindən, parlament təmsilçilərindən, nüfuzlu beynəlxalq təşkilatların rəhbərlərindən Milli Məclisin ünvanına təbrik məktubları gəlməkdə davam edir.
İslam Əməkdaşlıq Təşkilatı Parlament Assambleyasının Baş katibi Muhammed Xurayçi Niyas Milli Məclisin sədri Sahibə Qafarovaya ünvanladığı məktubda Azərbaycan parlamentinin rəhbərini Ermənistanla 30 illik münaqişədə qazandığımız Qələbə münasibətilə təbrik etməkdən məmnunluq duyduğunu vurğulayıb.
Baş katib təbrik məktubunda qeyd edib ki, İslam Əməkdaşlıq Təşkilatına üzv dövlətlərin Parlament Assambleyası artıq tarixə qovuşmuş olan həmin münaqişədə daim Azərbaycanın yanında olub, konfranslarında Azərbaycanın haqlı mövqeyini dəstəkləyən bəyanatlar verib. Vurğulayıb ki, Azərbaycanın haqlı mövqeyini dəstəkləyən BMT Təhlükəsizlik Şurası da həmin münaqişə ilə bağlı qətnamələr qəbul edərək Ermənistanı özünün silahlı qüvvələrini Azərbaycan ərazisindən çıxarmağa çağırıb.
Muhammed Xurayçi Niyas bölgədə sülhün bərqərar olması istiqamətində Azərbaycan tərəfindən atılan addımları alqışladıqlarını bildirib.
Uca Allahdan Azərbaycanda sülhün və sabitliyin hökm sürməsini, Azərbaycan xalqının bolluq və firavanlıq içində yaşamasını dilədiklərini vurğulayıb.
Bu xəbəri paylaş
(İsmayılova Xeyransa Eldəniz qızı)
.gif)
